8 мамыр күні Ұлы Отан соғысындағы Жеңістің 80 жылдығы қарсаңында Арқалық қаласының тыл ардагері, 90 жастың төріне шыққан Зинайда Семёновна Станкееваға ерекше құрмет көрсетілді. Арқалық қаласының орталықтандырылған кітапхана жүйесінің ұжымы ардагердің шаңырағына арнайы барып, сый-сияпат жасап, ардагердің өмір жолына тағзым етті.Іс-шара барысында кітапхана директоры Дәмет Есенжолқызы тыл ардагеріне шынайы алғысын білдіріп, тәтті тарту мен естелік сыйлық табыс етті. Ол өз сөзінде Зинайда Семёновнаға зор денсаулық, амандық және ұзақ ғұмыр тілеп, оның еңбегі мен ерлігі жас ұрпаққа әрдайым үлгі болатынын атап өтті. Зинайда Семёновна Станкеева — соғыс жылдарында майдан даласындағы жауынгерлерге қолдау білдіріп, тылда қажырлы еңбек еткен ержүрек арулардың бірі. Оның маңдай тері мен табандылығы ел тарихында өшпес із қалдырды. Ардагердің өмір жолы — бүгінгі ұрпаққа шынайы патриотизм мен Отанға деген сүйіспеншіліктің айқын көрінісі.
Кездесу барысында ардагер жүрекжарды алғысын білдіріп, ел ертеңі үшін қызмет етіп жүрген жастарға ақ батасын берді. Ол өзінің бастан өткерген қиын-қыстау жылдарын еске алып, бейбіт өмірдің қадірін білуге шақырды. Мұндай тағылымды кездесулер жастардың бойына ұлттық рух пен елге деген сүйіспеншілікті сіңіруге ықпал етеді. Ардагерлерге құрмет көрсету — ұрпақтар сабақтастығы мен елдің болашағына жауапкершілікпен қараудың жарқын көрінісі.
