Кітап және қаламгер

"Арқалық қаласының орталықтандырылған  кітапхана жүйесі" ММ Ұлттық кітап күніне арналған "Кітап және қаламгер" атты әдеби - рухани кеш ұйымдастырылды. Қалам мен парақтың, ой мен сөздің қадірін ұғынатын жанашыр қауым бас қосқан бұл тағылымды шара оқырмандарға ерекше рухани әсер сыйлады. Кешке қаламыздың зиялы қауым өкілдері, танымал қаламгерлер мен мекеме басшылары қатысты. Атап айтқанда, Арқалық қаласы әкімінің орынбасары Мешітбай Қайыржанұлы, қалалық мәдениет және тілдерді дамыту бөлімінің басшысы м.а. Жайнар Жақсылыққызы, Родина ауылы ардагерлер кеңесінің төрағасы Әбілов Байжан Әмірұлы, Арқалық педагогикалық университетінің аға оқытушысы, профессоры Ардақ Әмірханқызы, облыстық «Қостанай таңы» газетінің Арқалық қаласы бойынша меншікті тілшісі Мұрат Жүнісұлы, «Жаңа өмір» газетінің бас редакторы Оразхан Зейноллаұлы, Қазақстан Жазушылар одағының мүшесі, ақын Батырлан Сағынтайұлы, жас ақындар Ернұр Саянұлы мен Ернағыз Жанатқан, сондай - ақ ұстаздар, кітапханашылар мен оқушылар қатысты. Кеш барысында қатысушылар кітаптың рухани құндылығы мен қаламгер еңбегінің маңыздылығы жөнінде жүрекжарды лебіздерін білдіріп, әдебиеттің адам өміріндегі орны жайында ой қозғады. Оқырмандар әсерлі өлеңдер, жүректі тербеген естеліктер, тағылымды сұхбаттар мен әсем әндер арқылы шынайы рухани ләззат алып, әдебиет әлеміне сапар шекті. Бұл кеш жастардың кітапқа деген қызығушылығын арттырып, оқырман мен қаламгер арасындағы байланысты нығайтқан мазмұнды әрі мағыналы басқосу болды.